Ӗнер республикӑра ҫил вӑйлӑ пулнӑ. Ҫавна май хӑш-пӗр тӑрӑхра ҫутӑ та сӳнсе ларнӑ.
Инкеклӗ лару-тӑру патшалӑх комитечӗ пӗлтернӗ тӑрӑх, ӗнер каҫхине 19 ялта электричество сӳннӗ, 2,5 пин ытла ҫын шар курнӑ. Ҫак списока Улатӑр, Патӑрьел, Вӑрнар, Йӗпреҫ, Канаш, Муркаш, Вӑрмар муниципаллӑ округсенчи ялсем лекнӗ. Каҫхи 9 сехет тӗлне 11 бригада, пӗтӗмпе 29 ҫын, ӗҫленӗ. 22 сехет тӗлне 14 ялта ҫутӑ пулман.
Аса илтерер: ӗнер ҫил ҫеккунтра 20-25 метр хӑвӑртлӑхпа вӗрнӗ.
Етӗрне районӗнчи Кӑташ ялӗнче ӗнер, юпа уйӑхӗн 8-мӗшӗнче, пушар пулнӑ. 19 сехетре йывӑҫ ҫурта ҫулӑм ярса илнӗ.
«Хӗрлӗ автан» ҫурта питӗ хӑвӑрт ҫавӑрса илнӗ. Юрать-ха, ҫӑлавҫӑсем пушара кӳршисем патне куҫма паман. Шел те, кил хуҫи хӗрарӑмӗ, 63 ҫултискер, пушартан тухайман. Ҫулӑма сӳнтерсен унӑн виллине тупнӑ.
Шӑматкун Улатӑр районӗнчи Соловьевский поселокӗнче те пушар пулнӑ. Унта 50 ҫулти арҫын ҫуртсӑр тӑрса юлнӑ.
Улатӑр муниципаллӑ округӗнче пурӑнакан икӗ арҫынна ҫынна вӑрланӑшӑн явап тыттарасшӑн.
Пӑтӑрмах авӑн уйӑхӗн 27-мӗшӗнче пулса иртнӗ. Асӑннӑ округри Восход посёлокра 53 ҫулти арҫынна пӗрисем ӑн кӗртсе илме шухӑшланӑ. Хӑйсем ӳсӗр пулнӑ.
53-ри арҫын пӗрин арӑмне кӳрентернӗ-мӗн. Ҫавӑншӑн хайхисем тавӑрма шухӑш тытнӑ. Вӗсем арҫын патне килне кайнӑ. Унта ӑна хӗненӗ хыҫҫӑн машина ҫине лартса тухса кайнӑ. Арҫынна Чӗмпӗр облаҫне илсе ҫитернӗ. Унта та ӑна машинӑра тытнӑ. Шар курнӑ этеме, юрать, тухса тарма май килнӗ.
Авӑнӑн 27-мӗшӗнче Улатӑр районӗнчи Кире поселокӗнче 63 ҫулти арҫынна вӗлернӗ. 54-ри арҫынна тытса чарнӑ.
Следстви версийӗ тӑрӑх, лешӗ ун патӗнче хӑнара пулнӑ. Вӗсем вӑрҫӑнса кайнӑ. Кил хуҫи хӑнана ҫурӑмӗнчен ҫӗҫӗпе чикнӗ. Лешӗ ҫав вырӑнта темиҫе сехетрен вилнӗ.
54 ҫулти арҫын тӗлӗшпе пуҫиле ӗҫ пуҫарнӑ. Следователь ыйтнипе ӑна следстви вӑхӑтӗнче хупса усрама йышӑннӑ.
Улатӑр районӗнчи 67 ҫулти хӗрарӑмӑн иккӗмӗш хут инфаркт пулнӑ. Ӑна пӗр тӑхатамасӑр операци кирлӗ пулнӑ. Юрать, пациента санавиаципе Шупашкара илсе ҫитернӗ.
Хӗрарӑм авӑнӑн 13-мӗшӗнче кӑкӑр тӗлӗнчен ыратнине туйнӑ. Анчах выртсан иртсе кайнӑ та эмел ӗҫмен, тухтӑрсене чӗнмен. Кайран вӑйлӑрах ыратма пуҫланӑ. Кун хыҫҫӑн мӑнукӗ васкавлӑ медпулӑшу чӗннӗ.
Санавиаципе ӑна Республикӑри клиника пульницин юн тымарӗсен центрне илсе ҫитернӗ, ҫийӗнчех операци тунӑ. Ҫапла тухтӑрсем унӑн пурнӑҫне ҫӑлнӑ. Халӗ хӗрарӑм хӑйне лайӑхах туять.
Улатӑр районӗнче пурӑннӑ 63 ҫулти арҫын пушарта вилнӗ. Вут мӗнрен тухнине специалистсем палӑртӗҫ.
«Хӗрлӗ автан» ҫурла уйӑхӗн 22-мӗшӗнче Алтышево посёлокӗнче 23 сехетре алхасма тытӑннӑ. Вут-ҫулӑм йывӑҫ пӳрте тата унпа юнашар вырнаҫнӑ хуралтӑсене тӗп тунӑ.
Пушара сӳнтерме тӑватӑ техника хутшӑннӑ. Кил хуҫин пурнӑҫӗ вара пушарта татӑлнӑ.
Ҫулталӑк пуҫланнӑранпа пирӗн республикӑра 995 пушар тухнӑ, вӗсенче 39 ҫын пурнӑҫӗ татӑлнӑ.
Ҫурла уйӑхӗн 16-мӗшӗнче республикӑра икӗ аварире икӗ мотоциклист аманнӑ. Вӗсене санавиаци вертолечӗпе Шупашкарти пульницӑна илсе ҫитернӗ.
Пӗр авари Улатӑр районӗнче пулнӑ, тепри – Ҫӗмӗрле районӗнче. Икӗ мотоциклист та вӑйлах аманнӑ, иккӗшӗ те халӗ комӑра. Вӗсене санавиаци вертолечӗпе Шупашкарти васкавлӑ медпулӑшу пульницине илсе ҫитернӗ. Тухтӑрсем палӑртнӑ тӑрӑх, ку – питӗ лайӑх мел. Мӗншӗн тесен пуҫне амантнӑ пациентсене машинӑпа илсе килнӗ чухне ҫул ҫинче силлентерни сиен кӳрет.
Улатӑр районӗнче вӑрмана ҫуп-ҫап тата строительство юлашкипе тултарма тытӑнса кайнӑ.
Асӑннӑ тӑрӑхри Чуварлей ялӗ патӗнчи вӑрмана такамсем йӑлари хытӑ каяша тата строительство юлашкине пырса пӑрахнине прокуратура тӗрӗслевӗ вӑхӑтӗнче тупса палӑртнӑ. 30 тӑваткал метр ытла лаптӑка такамсем тултарса лартнӑ. Ун пек вырӑн Алтышево ялӗ ҫывӑхӗнчи вӑрманта та пулнӑ.
Вӑрмана тивӗҫлипе тытса тӑманшӑн, ӑна варалассинчен асӑрхассипе тивӗҫлӗ мера йышӑнманшӑн Улатӑр муниципалитет округӗ ячӗпе прокуратура асӑрхаттару хучӗ шӑрҫаланӑ. Ун хыҫҫӑн тин вӑрмана тасатнӑ.
Утӑ уйӑхӗн 18-мӗшӗнче юсавсӑр пуйӑса пула «Сӑрҫум» заповедник ҫумӗнчи курӑк ҫунма пуҫланӑ. 12 сехет тӗлӗнче Улатӑр районӗнче чукун ҫулпа тавар тиенӗ тӗтӗм мӑкӑрӑлтаракан пуйӑс иртсе кайнӑ. Вут-хӗм сирпӗтнӗрен чукун ҫул ҫывӑхӗнчи курӑк тивсе илнӗ.
Тӑватӑ ҫухрӑм тӑршшӗнче ҫулӑма ҫичӗ вырӑнта тупса палӑртнӑ, вӗсене пӗтерме виҫӗ сехет кирлӗ пулнӑ. Юрать-ха ҫулӑм вӑрман таран ҫитеймен — ӑна сухаласа пӑрахнӑ лаптӑксем тытса чарнӑ.
Ҫулӑма алхасма касса пӑрахнӑ ҫамрӑк хунавсем те пулӑшнӑ иккен. Электриксем ҫутӑ линине вӗсенчен иртнӗ, анчах хӑйсем хыҫҫӑн тирпейлесе хӑварман — каснӑ хунавсене ҫавӑнтах пӑрахса хӑварнӑ. Типӗ курӑк ҫинчи ҫулӑма вӑй илме вӗсем питӗ аван пулнӑ.
«Сӑрҫум» заповедникри пушарпа кӗрешекенсем кӑҫал чукун ҫул ҫине ҫулӑма сӳнтерме виҫҫӗ ҫитнӗ.
«Чукун ҫул ҫинчи турттаракан хатӗрсем улшӑнаҫҫӗ. Час-часах эпир реактивлӑ самолетсем евӗр ҫула касса пыракан ҫӗнӗ локомотивсене куратпӑр, анчах, шел пулин те, хӑшпӗр чухне вут тивертекенсем пуйӑссем те иртеҫҫӗ», — пӗлтернӗ хӑйсен пӑшӑрханӑвне «Сӑрҫум» заповедникре.
Хальхи вӑхӑтра Горький чукун ҫулӗпе, тата пушар тухассинчен тимлекен органсемпе пӗрлехи ӗҫ ирттереҫҫӗ.
Улатӑр районӗнче ҫуралса ӳснӗ космонавта орден пама йышӑннӑ.
Николай Бударин — Раҫҫей Геройӗ, Раҫҫейри чӑвашсен федераци шайӗнчи наципе культура автономийӗн пайташӗ. Ӑна Чӑваш Ен Элтеперӗ Олег Николаев «Чӑваш Республики умӗнчи тава тивӗҫлӗ ӗҫсемшӗн» орденпа чыслама йышӑннӑ. Хушӑва вӑл иртнӗ эрнере, ҫу уйӑхӗн 25-мӗшӗнче, алӑ пуснӑччӗ.
Николай Михайлович 1953 ҫулхи ака уйӑхӗн 29-мӗшенче Улатӑр районӗнчи Киря посёлокӗнче ҫуралнӑ.
Вӑл пуҫласа тӗнче уҫлӑхне 1995 ҫулхи утӑ уйӑхӗн 27-мӗшнче хӑпарнӑ. «Мир» орбита комплексӗн бортинженерӗ пулса Николай Бударин тӗнче уҫлӑхӗнче ҫавӑн чухне 75 талӑк ирттернӗ.
Пӗтӗмпе вӑл тӗнче уҫлӑхне виҫӗ хутчен улӑхнӑ, уҫӑ космоса сакӑр хутчен тухнӑ.
+12.5 °C